Philippians 1

1Bulus n Timatawus yi, Yesu Kristi a fyenu, eyi nu ka ga fye a Pasto n na abyedo yi n na Yesu viyi vinya n fye fi n Filibi zhi mi nyi.

2Shekwoyi anabarka ɓa kunsun n fyei vinya. E, mi zhin aduwa ge Shekwoyi eyi Dada, n Dagayi Yesu Kristi yi ɓa ga zaho-zahoi n fye mi owo anabarka nu-nuyi, n wo bugba fuyi nfye abugbami, n fye awye wyei n jesun. 3Omi aduwa vinya ɓa nu-riuyi lo n Shekwoyi Latuyi. 4Sanu n ma zhin aduwa ga fye, emi bugba nu-nuyi n na agmadai. 5Ntu fye bmazhin ɓo, fyei zhin aza ɓai kpe Nabari manayi, Kristi nya ɓeye, tunyi esa n fye ɓei wo har nsai ye. 6Mi tabata lo Shekwoyi n wa ya tnutnu manayi n fye mi nyi, wo ɓa gyi abye n fye bmazhin yi, fya mwa fi n wo alheri, sai esa n owo tnu-tnu n fye mi nku zo zhin, ewyi n Yesu Kristi ɓei jeze ɓe cei.

Bulus Yeye Nɓa Ba

7Kwo wulo cewo ma wo n mi mi ntu fye ɓo ngye shi mi wo nyi, ntuge, fye dnalo n mi bugba mwa. Yila gni bwa ngnisun Shekwoyi anabarka esa n mi ɓei dna n Kurkuku nyi, n esayi n mi ɓei la gmi nyi. Mi-i sunkun ntu gaiciya ɓo mi-i gna aza Kristi nabari. 8Shekwoyi gmanyi nu kpe lo shi mi ye fye lo n sun, n Yesu Kristi bugba ye-ye nya pyai. 9Emi aduwa zhin ga fye ekwo nu fya nu n Shekwoyi ye-yei na za aba, fya gyi abye n mwa-mwa yi dna n Zafun, n awyega yi. 10Gama mi ye Ifya kpe ɓe nukwoyi ye n ɓemanayi cewo. Fye ku ze a gyi-gyi-yi n fye mi, to oza mi wa gye fye laifin har esa n Dagayi ɓa jeze ɓe n cei. 11Fye zhin ɓemana nu ci-ci, aɓo n ɓa ɓa wu ge fye zhin Shekwoyi aɓi nu. Ntuge de ye ɓa ɓe n latu yi, n mwa-mwa yi n Shekwoyi aba.

12Mi cei pma lo fya kpe, omi azaje, aɓo vinya n ɓa bwa mi ya, kwo la ze apma nya kwoi zhin aza ɓai wo Nabari manayi Kristi nya. 13Ntuge aza vinya n ya, n na soja yi ɓe n ɓa kpe n ɓa abarki nyi, ɓa kpe lo ge mi dna n na awun, ntuge mr zhin Yesu viyi nu. 14Ntu n mi dna-dna ɓo n kurkuku n ya a Yesu viyi n mwa ɓa ku agmada nya. Omi atna zhin, n ku bugba kala ga ɓa, har ɓai gna aza Kristi nabari ntna edna.

15Azaho zhin waʼazi ntuge ɓa wo she, shi Shekwoyi zhin apma n miyi. Ɓaye a ciɓa nge ɓa zhin waʼazi n tna dna. Ama azaho zhin n bugba yi gmanyi. 16– 17Ɓai zhin waʼazi ntuge ɓa yemi, gama ɓa kpe lo ge Dagayi wa ɓe miyi n ya wa zhin apma n miyi ma kna gaiciya. Azaho zhin waʼazi ɓa zhin mi ma wo she, ɓai gye ge oɓa abye gyi ɓa ɓemi bugba zhizhiyi dna n Kurkuku ya. 18Ama kwo ɓai zhin waʼazi n kni nufi yi nuʼa, nya gmanyi n mi kpelo, a zhin Nabari manayi Kristi nya waʼazi lo, ai da mi lo.

Nya Kwo Zhin To Mi-i Fim

19Mi ɓa dagma, gama mi kpe lo shi fye zhin mi aduwa Zafun Gyi-gyi-yi bmami zhin, deye vinya ɓa ze ɓemana n mi aba. 20Gama mi zhin nubo n na awyetuyi, mi ta zhin ɓeho n kwo ɓa zhin mi ma wo mihin vinyikwon, ama ma gni n shiri yi zhin n saho-sahoi, ma da Kristi nabari n bugba kalayi, sa n mi dna n na a zhin gye n ya, shi mi shin gye n sapa n na abai ma ga Kristi mwa-mwa, kwo mi-i n wye-wyeyi kwo mi ya fi. 21Gama n mi aba wye-wyeyi zhin esa bwa nu ntu n Kristi ɓo, efi kuwa, n gna bmiya lo. 22Ama ngye n mi wye-wyei ɓa ga mi esa ma gni aza ga Kristi, to a gye mita kpe edo ye lo n kwo gna bmiya lon, Wye-wyeyi ko efi m. 23Nsahoi mi n cei pmalo ma gni wye-wyeyi sahoi mi to n cei pmalo n. Gama mi n cei pma lo ma lo mi kunsun n Yesu yi, Kwo ɓa gna ma gmada n mwa ma ndu n mi wye-wyeyi lo ya. 24Ama mi ɓa gnasun n na apmayi n fye aba mi-i ya gni n wye-wyeyi n ya.

25E, aye n mi ɓo yi pmalo n ya n na anyi ye, mi kpelo mi ɓeye dna n na anyi ye n sa fyewyi kpa, ama ma bma fye zhin, fya mwa, fya bwa bugba buyi dna fye gaiciya ga. 26Omi gni-gni n na anyi ɓa ga fye bugba buyi, kwoi ga fye dalili n fye ɓa la Kristi Yesu tu, n wo shi mi bwanyi, sanu n ma jeze ɓe efye aba n cei, ma zhin fye ziyara.

27Ama kwo kni ɓe nu yi bwa miʼa, fye pa, fya zan-zan ngye a Yesu viyi n na bai kwo to mi-i shan fye gye n shasun, mi ɓa wo nabari manayi nge fye mi zhin lo n bugbai gmanyi, fyei da Nabari manayi. 28Ntna edna, kwo ofye anuwunyi zhin fye n wuna na. Kwo ɓa wu ɓa nge ɓala kaya, ama n fye aba kwo ɓa wufye nge Shekwoyi kunsun lo n fyei. Woi la wye-wyeyi nyalo-nyalo nya ga fye n gnisun n woi. 29Gama n fye aba ala esa ga fye, to ge fya kpema wo kawai m, ama fya gye azhin ntu wo ɓo. 30Yi filo n okun ye n gnisun, fye ku gye mi-i sin wahala Intu wo ɓo n sapai, har sayi mi ye dna lo n wahala atan-tasin, ngye shi fye kpe lo.